2018/12/14

Irati Arrien gazte gernikarraren turismo natural eta jasangarriaren aldeko ’Glamping Busturialdea’ proiektuak irabazi dau Busturialdeko V. Enpresa Ideia Lehiaketa


Bermeoko eta Gernika-Lumoko Udaletako Gazteria Zerbitzuek eta Urremendi Landa Garapen Elkarteak antolatzen daben Busturialdeko V. Enpresa Ideia Lehiaketak badaukaz irabazleak. Irati Arrien Jauregi gernikarrak lortu dau lehenengo saria, 3.000 eurokoa ’Glamping Busturialdea’ izeneko ideiagaz. Bigarren saria, 2.000 eurokoa, Ander Etxaniz de Miguel eta Borja Txertudi Gangoiti busturitarrek lortu dabe ‘Hondabizi’ ideiagaz.

Aurtengo Busturialdeko V. Enpresa Ideia Lehiaketaren sari banaketa ekitaldia Gernika-Lumoko Elai Alai aretoan burutu da. 'Glamping Busturialdea' izeneko ideiak jaso dau 3.000 euroko lehenengo saria eta 'Hondabizi' ideiarentzat izan da bigarren saria, 2.000 eurokoa. Ganera, Arratzuko Elkartegian urtebeteko langunea be irabazi dabe. Guztira, 13 izan dira eskualdeko ekintzaile gazteek aurkeztu dabezan enpresa ideiak.

Lehenengo saria jaso dauan 'Glamping Busturialdea' eskualdean, Matxitxako inguruan, kokatuko dan eta %100ean jasangarria izango dan glamping-a da. Busturialdean turismo natural eta jasangarria sustatzeko ostatu alternatiboa proposatzen dau Irati Arrien (Gernika, 1996) gazteak. Ideiaren sustatzailea Lidergo Ekintzailea eta Berrikuntzan (LEINN) graduatua da eta 22 urte daukaz eta azken urteetan internazionalizazino eta hezkuntza proiektuetan lanean aritu da mundu osoan.


Bigarren saria jaso duen 'Hondabizi' ideiak produktu lehiakorrak sortzeko hondakin organikoen kudeaketa, tratamenduak eta balio erantsiko soluzinoak eskaintzen dauz. “Ideia egunero sortzen doguzan hondakinek suposatzen daben arazotik agertzen da, honeek kudeatu eta berrerabilpen egoki bat emoteko ideiatik. Busturialdean daukagun egoera aztertu ostean sortzen da ideia, merkatua hau garatzeko aukera ikusten dogu eta ingurumenagaz eta jasangarria dan bizitzeko modu bategaz konpromezua daukan enpresa bat martxan jarri gura dogu”, dinoe sustatzaileek.

Ander Etxaniz (Busturia, 1992) eta Borja Txertudi (Busturia, 1993) biak dira busturitarrak. Etxaniz Geologian graduatua da eta Ingurumenari aplikatutako bioteknologia ikasten ari da. Txertudi, barriz, Elektromekanika ikasitakoa da. “Landa eremuan bizi izaterakoan, txikitatik ezagutu dot hondakin organiko ezbardinen balorizazinoa, bai lurren emankortasunerako edo bai erabilera energetikoetarako”, dino.

Danatara, 5.000 euro banatu dira saritan, negozio ideiok martxan jartzen laguntzeko. Lehiaketaren helburuetako bat eskualdean lanpostu barriak sortzea bermatzea da. Ganera, proiektu irabazleek urtebetez Arratzuko Elkartegian langune bat doan erabiltzeko aukera izango dabe, Busturialdeko Gazteria zerbitzuek ordainduko baitabe langune hori.


Maitane Leizaola, BFAko Bizkaiko Behatokiko Zuzendari Nagusiak; Juan Karlos Agirre, Bermeoko Udalako Gazteria zinegotziak; Jose María Gorroño, Gernika-Lumoko alkateak eta Urremendi LGEko presidenteak eta Kortezubiko Alkateak, Ibon Legarza Albizurik, parte hartu dabe aurtengo sari banaketan.

Busturialdeko V. Enpresa Ideia Lehiaketa Urremendi Landa Garapen Elkarteak batzen dauzan Arratzu, Ereño, Forua, Gautegiz-Arteaga, Kortezubi, Mendata, Morga, Mundaka eta Sukarrietako udalek eta Bermeoko eta Gernika-Lumoko udaletako gazteria zerbitzuek jarri dabe martxan bosgarren urtez jarraian. Bere helburuak, beste batzuen artean, ekintzailetza kultura hedatzea, Busturialdean lana eta aberastasuna sortzea eta eskualdeko ekonomia sustatzea dira. Lehiaketa, Bizkaiko Foru Aldundiaren ‘Gaztedi Busturialdea’ proiektuan kokatzen da, ‘Lana bilatzea, Lana da’ programaren barne.

Epaimahaia honako honeek osotu dabe:

- Bermeoko Udaleko ordezkaria: Nere Mintegi Elorriaga (Behargintzako zuzendaria).
- Bizkaiko Foru Aldundiko ordezkaria: Paula Pereda Perez (BEAZeko teknikaria).
- Gernika-Lumoko Udaleko ordezkaria: Joseba Irazabal Obieta (Lanbide Ekimenak Gernika-Lumoko teknikaria).
- HAZIko ordezkaria: Elisabet Gorospe Gorostiza (Ekintzailetza eta prestakuntza arloko arduraduna).
- Urremendi Landa Garapen Elkarteko ordezkaria: Joseba Mallea Lamikiz (Gazteriako ordezkaria).

Baloratzeko orduan, honako irizpide honeek hartu dira kontuan: izaera barritzailea, balio erantsia eskaintzea edota originaltasuna; enplegua sortzeko daukan potentzialidadea eta sortutako lanpostuen kalidadea; ekintzaile taldeak proiektua aurrera eroateko daukan gaitasuna; Busturialdean proiektu hori aurrera eroateko aukera egotea edo eskualde honetan proiektu horrek daukan egokitzapena; proiektuaren definizino-garapen maila; proiektuaren jasangarritasuna (ekonomikoki eta ingurumenagaz) eta daukan gizarte-eragina.

2018/10/18

BERMESEX, Bermeoko Sexologia Orientazino Zerbitzua, barriro be martxan jarriko da barikuan, irailaren 21ean, 16:00etatik aurrera


Udako etenaldiaren ostean, bariku honetan, irailaren 21ean, barriro be martxan jarriko da Bermesex Bermeoko Sexologia Orientazio Zerbitzua, Gizarte eta Kultura Etxean, 16:00etatik 17:30era

BERMESEX, sexualidadeari buruzko informazinoa eta orientazinoa emoteko zerbitzu publikoa, doakoa eta konfidentziala da.


Bermesex, Bermeoko Sexologia Orientazio Zerbitzua, Bermeoko Gizarte eta Kultura Etxean eskaintzen da, barikuro. Zerbitzuaren helburua da sexualidadearen eta sexuaren bizipenean modu onuragarriak eta mesedegarriak bilatzeko orientazinoa emotea.

Bermesex zerbitzuko adituak, hainbat gairi buruzko orientazinoa emoten dau bariku arratsaldero Bermeoko Gizarte eta Kultura Etxean, besteak beste: sexu bidez transmititutako gaixotasunak (STG), antisorgailuak, tabuak, sexu orientazinoa...

Bermesex zerbitzuaren bidez, herriko eta eskualdeko gazteei lagundu gura jake modu partikularrean ezagutu, onartu eta adierazo daitezan, holan, euren adineko beste gazte batzuekaz hartu-emonak izateko modu onuragarriena bilatzeko. Helburu hori lantzeko gazte, familiarteko eta profesionalakaz egiten da lan. Holan ba, zerbitzua gazteei, gazteen gurasoei eta gazteekaz lan egiten dabenei (irakasleak, hezitzaileak, begiraleak, e.a.) zuzenduta dago.

Aurrez-aurreko arreta zuzena barikuro eskaintzen da, 16:00etatik 17:30era, Bermeoko Gizarte eta Kultura Etxeko bigarren solairuan. Ganera, profesionalakaz koordinatzeko aukera be badago.

Orientazinoaren bidez, profesional ezbardinekaz eta familia kideekaz alkarlanean, ume, gazte, familia eta hezkuntza baliabideen arazoei urtenbideak topateko bideak hausnartuko dira, egoera bakotxean esku hartzeko modu, eragile eta ekintza egokienak aztertuz. Ganera, proposamen ezbardinak eraiki daitekez, esate baterako: sexu hezkuntza programak, guraso eskolak, profesionalentzako ikastaroak, berbaldiak, informazino kanpainak, e.a.

Teknologia barriek aholkularitza ekintzak burutzeko aukerak zabaldu dabez, besteak beste, sare sozialak, skype bidezko bideokonferentziak, txata, e.a. Holan ba, Bermesex zerbitzuak orientazinoa on-line eta telefonoz egiteko aukerak eskaintzen dauz, hain zuzen be:

  e-posta: bermesex@bermeo.eus
•  Telefonoa: 644 898 661 (Arreta orduetatik kanpo deituz gero, mezua itzi daikezu erantzungailuan, zure telefonoagaz, eta zugaz hartu-emonetan jarriko gara)
  Skype: orientazio.zerbitzua
  Facebook: Orienta Zerbitzua
  Twitter: @sexorienta 

2018/09/14

Irailaren 28an, barikuan, hasiko da martxan Berbalagun ekimena

Bermeoko Udaleko Euskera Sailak, AEK eta Gotzon Garitaonaindia Euskaltegiak eta Hizkuntza Eskolak Berbalagun ekimena jarri dabe martxan aurten be. Berbalagunen helburua, astean behin lagunekaz alkartu eta gustuko ekintzak eginez euskeraz berba egitea da.

Lagun taldeak zaletasun, adin eta denpora librearen arabera astean behin alkartzen dira eta talde bakotxak erabagitzen dau zer egin, noiz eta non. Ganera, bestelako jarduera batzuk be antolatzen dira: tailerrak, urteerak, ikus-entzunezko emonaldiak eta berbaldiak... Ekintzak jakitera emoteko buletinak be argitaratzen dabez eta horreen bidez Berbalagunen lehiaketetan parte hartu daiteke.

Euskeraz berba egin gura dauen edozeinek parte hartu ahal dau Berbalagun programan, ikasle izan edo ez, berba egiteko gogoa baino ez da behar. Euskeraz ondo berba egiten dabenentzako be bada, trebatu gura dauenagaz astean behin batuz laguntza ederra emoten baita.

Izena emon edo informazino gehiago gura izanez gero, honako honeek dira bideak:

• Dinamizatzailea (whatsapp): 607 609 580
• AEK euskaltegia: 609 462 018
• Gotzon Garitaonaindia euskaltegia: 688 651 491
• Hizkuntza Eskolea: 94 618 70 91
• Udaleko Euskera Saila: 94 617 91 22
• Helbide elektronikoa: bermeoberba@gmail.com

Egitasmoa Facebooken eta berbalagunen blogean be jarraitu daiteke, han argitaratzen dira barri guztiak eta izena emoteko aukera bertan dago eskura zuzenean.

2018/06/18

Bermeoko 18 eta 35 urte bitarteko gazteei Alde Zaharrean etxebizitzen alokairua ordaintzen lagunduko deutsie Udalak


Bermeoko Udalak bigarren urtez martxan jarri dau 18-35 urte bitarteko gazteei Alde Zaharreko etxebizitzen alokairua ordaintzen laguntzeko diru-laguntzen programa. Honezkero egin ahal dabez diru-laguntza eskaerak gazteek, urtea amaitu arte edo laguntzak amaitu arte.

Programaren helburuak, beste batzuen artean, gazteei emantzipazino bidean laguntzea, herrian dagozan etxe hutsak merkaturatzea edota gazteak Alde Zaharrera erakartzea dira, Bermeoko Alde Zaharra bizibarritzeko asmoagaz.

Eskatzaileek baldintza batzuk bete beharko dabez diru-laguntza horreek jaso ahal izateko, beste batzuen artean:
  • Norbanakoen kasuan: 18 eta 35 urte bitarteko adina izatea.
  • Beste pertsona batzuekaz bizi diranak: Bizikidetza unidade kasuan, gitxienez bikotekide batek izan behar dau 18 eta 35 urte bitarteko adina. Bizikidetza unidadeagaitik ulertuko da bikote bat, kide biak adinez nagusikoak, euren kargura adin txikikoak izan ala ez, edo pertsona bakarra adin txikikoak bere kargura dauzana. Pisukideen arteko hartu-emon ekonomikorik ez badago, betekizunak betetzen dauzan pisukide bakotxak diru-laguntza eskaria aurkeztu ahal izango dau. Kasu horretan, guztien artean lortutako diru-laguntzak ezin izango dau pisuko gehienezko diru-laguntza gainditu.
  • Eskatzaileak gehienezko diru sarrera honeek eukitea: 28.000 eurora arte (irabazi gordina) eskatzailea pertsona bakarra danean eta 39.000 eurora arte (irabazi gordina) eskatzailea bizikidetza unidade bat bada edo pisukideen arteko hartu-emon ekonomikorik ez badago.
  • Eskatzaileek edo bizikidetza unidadeko kideek ezingo dabe bere jabetzako etxebizitzarik izan.
  • Alokairuak, gitxienez, urtebeteko iraupena izango beharko dau.
  • Gitxienez, bizikidetza unidadeko pertsona bat Bermeon erroldatuta egotea 3 urtean edo azken urtean eten barik.
  • Bizikidetza unidadeko kide guztiek Bermeoko Udaleko zerga, tasa eta zehapenen ordainketa egunean izan beharko dabe.
  • Onuradunen eta errentatzailearen artean ezin izango da familia loturarik izan odolkidetasun edo ahaidetasuneko bigarren mailaraino.
200 euro arteko diru-laguntzak
Diru-laguntzei jagokenez, gehienez, 200 euro artekoak izango dira, beti be, eskatzaileen diru sarreren arabera. Deialdi horren kontura jaso daitekeen diru-laguntza 2018ko errentari jagokona izango da. Diru-laguntzak jaso gura dabezan gazteek 2018. urtea amaitu arte eskariak aurkeztu ahal izango dabez Bermeoko Berhaz bulegoan.

Pasa dan urteko arrakasta ikusita jarri dau martxan aurton be udalak programa. Hain zuzen, igaz 25 eskaera onartu baziran be, 40 herritar gazte izan ziran onuradunak, izan be, laguntzak norberak bakarrik, bikotekideagaz edota beste pertsona batzuekaz eskatu ziran.

2018/05/30

Busturialdeko hamar gazte eskualdeko enpresetan trebatuko dira 'Gaztedi Busturialdea Bekak 2018' programari esker


Busturialdeko hamar gaztek eskualdeko enpresatan trebatzeko aukera izango dabe aurton be "Lana bilatzea, Lana da" programari eta Gaztedi Busturialdea egitasmoari esker, lanekoak ez diran formazino beken bitartez. Busturialdeko hainbat udalek eta Bizkaiko Foru Aldundiak sustatuko dabez beka horreek, Lanbideren bitartez.

Bekadunak izango diran gazteek, gehienez sei hilabetez benetazko lan merkatura hurbiltzeko eta prestakuntza eta lana uztartzeko aukera eukiko dabe, hau da, eskualdeko enpresatan lanekoak ez diran praktikak egin ahal izango dabez.

Beka horreek eskuratzeko interesa daukien gazteek baldintza batzuk bete beharko dabez:

• 18-25 urte izatea, biak barne (edo 30 urte baino gitxiago izatea, Gazte Bermea Sistema Nazionalean inskribatutako pertsonen kasuan).
• Lanbiden lan eskatzaile moduan agertzea.
• Lanbide Heziketako oinarrizko, erdi-mailako edo goi-mailako titulua, profesionaltasun ziurtagiria edo unibertsitate titulua (diplomatura, lizentziatura edo gradua) izatea.
• Jasotako prestakuntzagaz erlazino zuzena daukan hiru hilabetetik gorako lan-esperientzia ez izatea.
• Bizkaiko Foru Aldundiagaz batera 'Gaztedi Busturialdea' hitzarmena sinatu daben udalerrietako batetan erroldatuta egotea, hain zuzen be: Arratzu, Bermeo, Ereño, Forua, Gautegiz Arteaga, Gernika-Lumo, Kortezubi, Mendata, Morga, Mundaka eta Sukarrieta.

Bekaren zenbatekoa hilero 460 eurokoa izango da eta hilabete bakotxaren amaieran jasoko da. Bekadunari, ganera, Gizarte Segurantzaren Erregimen Orokorrean alta emongo jako, lanekoak ez diran praktiken kotizazino-kontuaren kodean.

Bekek ikasitakoa praktikan jartzeko eta lehen lan esperientzia ordaindua izateko aukera eskainiko deutsie eskualdeko gazteei. Parte hartzaileek, ganera, banakako tutoretza eta coaching-a izango dabe euren garapenean eta prestakuntzan laguntzeko asmoagaz.

2014tik hona eskualdeko 35 gaztek burutu dabez euren praktikak Busturialdeko beste horrenbeste enpresatan eta euretariko asko, ganera, lanean geratu dira bekak amaitu ostean.

Eskariak egiteko epea zabalik
'Gaztedi Busturialdea Bekak' programan parte hartu gura daben eskualdeko gazteek edota enpresek, Bermeoko Udalaren Gazteria Zerbitzuagaz hartu-emonetan jarri beharko dira 94 617 91 58 telefono zenbakira deituta edo GIZera hurbilduta (Gizarte eta Kultura Etxeko lehen solairuan). Gaztedi Busturialdearen webguneko 'Bekak' ataletik be egin daiteke eskaria.

Beken onuradunen hautaketa prozesua Lanbidegaz batera egingo da enpresak eskatutako profila oinarri hartuta.

Lehen bidarrez lan arloan esperientzia lortzea da Gaztedi Busturialdea beken helburua, holan, lan merkatuan errezago sartzea ahalbideratuz.

2018/05/29

Europara bidaiatuko badozu atara eizu Europako Osasun Txartela, Batasuneko edozein herrialdetan osasun zerbitzua izateko


Alemania, Austria, Belgika, Bulgaria, Zipre, Danimarka, Eslovakia, Eslovenia, Estonia, Finlandia, Frantzia, Grezia, Hungaria, Irlanda, Islandia, Italia, Kroazia, Letonia, Liechtenstein, Lituania, Luxenburgo, Malta, Norvegia, Herbehereak, Polonia, Portugal, Erresuma Batua, Txekiar Errepublika, Suedia edo Suitzara bazoaz, ez ahaztu Europako Osasun Txartela.

TSE txartela banakakoa da eta titularrari osasun zerbitzuak jasotzeko eskubidea bermatzen deutso. Zerbitzu horreek Europako Batasuneko herrialdeetan, Europako Esparru Ekonomikoko herrialdeetan eta Suitzan jaso ahal izango dira. Horretarako, zerbitzuak eta herrialdean igaroko dan denbora hartuko dira kontuan.

Eskatzen daben pertsonei emongo jake txartela eta turismoko bidaietan, ikasketa edota pentsioarengaitik egiten diran leku aldaketetan erabili ahal izango da. Txartelean titularraren izena, NAN zenbakia eta atzetik daukan Segurtasun Sozialeko Institutuaren zenbakia agertuko dira. Horreri esker tramiteak asko arinduko dira, izan be, orain arte derrigorrezkoa zan gaixoa bere herrialdeko Segurtasun Sozialeko bulegoagaz hartu-emonetan jartzea.

Europako Osasun Txartelari esker, Europar Batasuneko hiritar guztiek jaso ahal izango dabe Batasuneko edozein herrialdetan osasun zerbitzua. Doako zerbitzua izango da hori, eta ordaindu behar baldin bada, ondoren egingo da hori. Txartelaren balioa urte bikoa da (txartelean bertan adierazoten da iraungitze-data).

Zelan eskuratu?
• On line, Gizarte Segurantzaren Bulego Birtualean eskatzen badozu, etxean jasoko dozu txartela.
• Telefono bidez: 901 16 65 65 telefono zenbakira deitu eta etxean jasoko dozu txartela, egun gitxiren epean.
• Gizarte Segurantzaren bulegoetan: Bilbon: Avda. Sabino Arana, 3 - 944 284 545 - Vicente Garamendi, 6 - 944 333 003 - Iruña, 13 - 944 478 366 - Gran Vía, 89 - 944 284 517 eta Gernikan: Juan Calzada, 89 - 946 257 107

2018/05/25

14-29 urteko gaztea bazara eta Euskadin erroldatuta bazagoz atara eizu Gazte Txartela eta gozatu daukazan abantaila danakaz

Euskadin bizi diran 14 eta 29 urte bitarteko gazteek atara ahal dabe Gazte-txartela. Ez dauka finantza zerbitzurik eta lortu ahal izateko ez da kontu korronterik zabaldu edo izan behar aurrezki kutxan. Internet bidez bakarrik lortu daiteke.

Gazteei zuzendutako beste txartelak ez bezala, Gazte Txartela Europan homologatuta dagoan gazte-txartel bakarra da, European Youth Card Association (EYCA) alkartearen barne baitago. Holan ba, Gazte Txartelaren titularrek, txartelak eskaintzen dauzan abantailaz baliatzeko aukera izateaz ganera, beste ganerako Autonomia Erkidegoetako eta EYCAko kide diran Europako 38 herrialdeetako gazte-txartelen abantailak be badaukiez.

Gazte-txartelak 6 euroko igortze-tasa dauka eta titularrak 30 urte betetzen dauzan egunean iraungiko da.

Gazte-txartelak deskontu iraunkorrak (garraioak, ostatua, prestakuntza, kultura, kirolak, osasuna, turismoa, e.a.), lehiaketak eta zozketak, bidaia-asegurua, ikuskizunetarako sarrerak, teknologia eta askoz gehiago eskaintzen dau. Gazte-txartela aurkezteagaitik bakarrik, gazteei deskontuak eskaintzen deutsiezan 2.000tik gora establezimendu dagoz Euskal Autonomia Erkidegoan bakarrik. Ikusi hemen Euskadiko abantailak, udalerriaren edo sektorearen arabera.

Zelan lortu Gazte-Txartela?
Gazte-Txartela eskuratzea oso erraza da, hona hemen txartel hori lortzeko bidea:
Ordainketa egin ostean, astebete bi inguruko epean jasoko dozu txartela etxean.

2018/05/22

Izen-abizenak euskal grafiaz idazteko “Izena duenak izana du” kanpaina martxan jarri dau Bermeoko Udalak

Euskerazko abizenak euskal grafiagaz idazteko ‘Izena duenak izana du’ sentsibilizazino kanpaina martxan jarri dau Bermeoko Udalak, UEMAren laguntzagaz, “munduan euskaldunek presentzia izateko”.

Bermeon oso zabalduta dagozan abizen asko idatzi daitekez euskeraz, adibidez: Atxikallende, Allika, Argiarro, Astiazaran, Etxebarria, Bulukua, Markaida, Erauzkin, Gabantxo… Helburua da euskal abizena modu ofizialean gaztelaniazko grafiaz idatzita daukanak pausua emotea eta epaitegian eskatzea aldaketa.

Aipatutako informazino-orrietan jasotzen danez, hiru pausu erraz emon behar dira abizenak euskal grafiaz idazteko. Holan, interesa daukan pertsona lehenik eta behin erregistro zibilera edo bake epaitegira joan behar da, eta abizena euskal grafiaz ipini gura dauala esan.

Emongo deutsoen eskaera orria bere datuekaz beteko dau eta honako agiri honeek eroan beharko dauz:
  • Nortasun Agiriaren fotokopia (adinez nagusia ez danak gurasoena eroan behar dau).
  • Hitzez hitzeko jaiotza ziurtagiria (epaitegian eskatzen da).
  • Errolda agiria (Udaletxean eskatzen da eta, adinez nagusia ez bada, gurasoena beharko dau).
  • Familia-liburuaren fotokopia (familia edo seme-alabak badaukaz).
  • Seme-alaben nortasun agiriaren fotokopiak, 16 urtetik gorakoak badira.
Horretaz ganera, izena edota abizena euskeraz zelan idatzi behar dan kontsultatzeko www.euskaltzaindia.eus webgunean bilatu ahal izango da informazino osotua.

Informazino-orriak udal zerbitzuetan (Berhaz, Behargintza, Liburutegia, Gizarte eta Kultura Etxea, Musika eskola, Kiroldegia eta Euskera Saila) eta Bake Epaitegian egongo dira, eta ikastetxeetara be zabaldu dira.

Bestalde, epaitegietan egiten diran beste tramite batzuk be euskeraz egin daitekez. Holan ba, epaitegian erregistratzen diran jaiotza, ezkontza eta heriotza-inskripzinoetan, euskera erabiltzeko aukera badago.

2017/10/02

Busturialdeko gazteria zerbitzuek Gaztedi Busturialdearen webgunea martxan jarri dabe, eskualdeko gazteentzat


Bermeoko eta Gernika-Lumoko udaletako Gazteria zerbitzuek eta Urremendi Landa Garapen Elkarteko Gazteria zerbitzuak www.gaztedibusturialdea.eus web-orrialdea jarri dabe martxan, Bizkaiko Foru Aldundiaren 'Udal Gaztedi' programaren barruan. Horretan, Gaztedi Busturialdea proiektuan lantzen dabezan lan ildoak batzen dira.

Enplegua, bekak, prestakuntza eta ekintzailetza dira lan arlo nagusiak eta horreetan eskaintzen dabenaren informazinoa batzen da webgune barrian. Ganera, ikastaro, berbaldi edo bestelakotan izena emoteko aukera be dago bertan.

Atariak, ganera, ikastaro, hitzaldi edo bestelakotan izena emoteko izapideak be errezten dauz, aukera emoten baitau izen-emotea bertan egiteko.

2017/09/05

Bermeoko hamabost musikari gaztek "Miñen Puntiegaz" izeneko abestia sortu dabe Udalaren ‘Geuk Eus’ kanpainaren barne


Geuk Eus’ euskeraz bizitzeko 1.000 arrazoi kanpainaren barne, gure herriko musika taldeetako hamabost musikari gaztek euskeraz dantzatzeko eta abesteko "Miñen Puntiegaz" abestia sortu dabe. Zona Cero, Zartada, Etxekalte, Ozhen, Urgatz eta Ttakuntxo taldeetako musikariak eta Gatom eta Leire Gotxi dira, hain zuzen be, abesti honen egileak.

Euskeraren kale-erabileraren azken datuek dinoenez, gazteak dira euskera gitxien erabiltzen dabenak Bermeon. Holan ba, herriko musika taldeen eskutik herriarentzat abesti bat egitea erakargarria eta interesgarria izango litzatekeela pentsatu eban Udalak; bermeotar gazte sortzaileen lana ezagutarazoteko eta argira emoteko, eta, aldi berean, euskera bultzatzeko. "Miñen puntiegaz" abestia horretarako oso aproposa da, musikari, erritmo eta ekarpen asko alkartu diralako kantaren inguruan.

Abestia prestatzeko lan handia egin da eta Bermeoko Udalak Lore Barrena bermeotar gazteari aipamen berezia egin gura deutso hasikerako proposamenean buru belarri lan egin daualako. Ikusi hemen kantaren bideoklipa.

Honako hau da "Miñen puntiegaz" abestiaren letra:

Zenbat bider kruze gara
ta eguno ikusi bez,
gaurkuen emon dost
barruek ziabogie.
Erdu! Hurretu! Esan zozer belarrire!
Dxusturi perfekto baten
erantziku lotsie.

Miñen puntiegaz
mizkeku hitz osue (itsosue),
kalerik kale ibilko gara dandarrez.

Dxo sirenie… entera daidxela herri osue…

Musturrek jangotsutez
bermiotarrez!!
(birritan)

Berbak labandukuz gehidxau ezin artien,
berbak loitxukuz berandurartien.
Nireñe hurretukeran okiñ akorduen,
gau ta egun ingotsut astiro… euskerie.

Musturrek jangotsutez
bermiotarrez!!

Bermiotarrez dxangotsutez musturrek.
Okin argi: ez, da ez!
Miñe barroraino hizkuntzi ikutu arte.

Bermiotarrez dxangotsutez musturrek.
Okin argi: ez, beti da ez!
Neska zein mutil, nagusi zein gazte,
eskuek batuz euskerien alde!

Dxo sirenie… entera daidxela herri osue…

Musturrek dxangotsutez
Bermiotarrez!! (birritan)

Bermiotarrez dxangotsutez, bai musturrek!

Musturrek dxangotsutez
Bermiotarrez!! (askotan)