Bermeoko Ludotekak programazino berezia prestatu dau maiatzerako, ikasturte honetako azkena

Maiatzean be LUDOTEKA martxan egongo da, jarduera bereziekaz!

Maiatzaren 29an eta 30ean, ikasturteko amaiera jaialdia egongo da! Ez galdu!

👧🧒 6-11 urteko ume eta gaztetxoentzat

📅 Bariku eta zapatuetan

⏰ 17:00 – 20:00

📍 Bermeoko Gizarte eta Kultura Etxean

Maiatzaren 22ra artekoa izango da Bermeoko Oinarrizko Lanbide Heziketako Udal Institutuan aurrematrikula egiteko epea

Bermeoko Oinarrizko Lanbide Heziketako Udal Institutuan aurre-matrikula egiteko epea maiatzaren 22ra arte egongo da zabalik, gura daben herriko gazteek Oinarrizko Lanbide Heziketako zikloak egiteko.

2026/2027 ikasturtean Bermeoko Oinarrizko LHko Udal Institutuan eskainiko diran zikloak honako honeek izango dira: Sukaldaritza eta Jatetxe-arloa eta Ibilgailuen Elektromekanika. Ziklo horreek ikasturte biko iraupena daukie eta epealdi horren barruan enpresetako praktikak egiten dira, bigarren ikasturtean.

Aurkeztu beharreko dokumentazinoa:

15 eta 17 urte bitartekoek ondokoa aurkeztu behar dabe:

• Ikaslearen nortasuna eta adina egiaztatzen dauzan agiria.
• Gurasoen edo tutoreen nortasunak egiaztatzen dabezan agiriak.
• Familiaren erroldatze-agiria.

17 urterik gorakoak ondokoa aurkeztu behar dabe:
• Ikaslearen identidadea eta adina egiaztatzen dauen dokumentua.

Oinarrizko mailako heziketa-zikloetan sartzeko baldintzak:

1. DBHko ikasketak egiten ari diran ikasleek baldintza bi bete behar dabez:

• 15 urte beteak izatea, edo jagokon urte naturalaren barruan betetea.
• Gitxienez, DBHko bigarren kurtsoa egiten edo eginda izatea.

      2. Era berean, eskabidea egiteko aukera izango dabe:

• Espainiako hezkuntza-sisteman eskolatuta egon ez diran gazteak, baldin eta 15 urte badaukiez edo urte naturalean beteten badabez.
• 17 urtetik gorakoek, baldin eta Lanbide Heziketako titutulurik ez badaukie edo bigarren hezkuntzako ikasketak amaitu barik badaukiez.

Heziketa arautua

Bermeoko Oinarrizko LHko Udal Institutuan eskaintzen dan heziketa arautua da, balio akademikoa eta profesionala dauka (Lanbide Heziketako Lanbide Kualifikazinoen katalogoaren barruan sartuta dago) eta Espainia osorako balio dau. Oinarrizko Lanbide Heziketako titulua lortzen daben ikasleek Erdi Mailako zikloetan matrikulatu daitekez zuzenean, euren ikasketakaz jarraitzeko edota lan munduan sartzeko helburuagaz.

Azpimarratzekoa da derrigorrezkoa dala aurrematrikula egitea gero matrikula egin ahal izateko. Izen-emotea Bermeoko Oinarrizko LHko Udal Institutuan bertan egin behar da (Atalde 8), 9:00etatik 14:00etara. Informazino gehiago gura izanez gero, 946179175 telefono zenbakira deitu edo 688629102 WhatsApp zenbakira mezua bialdu behar da.

Maiatzean 'Tik-Tak-Tok Astea' programa emongo da herriko ikastetxeetan, pantailen erabileraren inguruko prebentzinoa indartzeko

Bermeoko ikastetxe guztiek Tik-Tak-Tok Astea hartuko dabe maiatzean, pantailen erabilera egoki eta arduratsuaren inguruko prebentzino-lana indartzeko helburuagaz. Ekimena herriko hiru ikastetxeetan garatuko da, eta LH 5. eta LH 6. mailetako ikasleekaz egingo diran tailer praktikoen bidez landuko da, besteak beste, teknologiarekiko harremana.

Programaren ardatza pantailen erabileraren inguruko hausnarketa sustatzea da, ikuspegi kritiko eta kontziente batetik. Horretarako, saioak metodologia parte-hartzaileetan oinarrituko dira, dinamika interaktiboak eta ikaskuntza dialogikoa uztartuz. Tailerretan sare sozialen eta bideo-jokoen erabilera aztertuko da, eta, era berean, ziberjazarpenaren (ciberbullying) prebentzioan jarriko da arreta.

Horrela antolatuko da maiatza:

• Maiatzak 4–8: Sagrado Corazon Ikastetxea
• Maiatzak 11–15: Eleizalde Ikastola
• Maiatzak 18–22: Bermeoko Herri Eskola

Ekimen honek jarraipena ematen deutso 2024-2025 ikasturtean egindako esperientzia pilotuari, Bermeoko Herri Eskolan gauzatu baitzan lehen aldiz, Familia Elkartearen eta Bermeoko Udalaren alkarlanari esker. Orduko emaitza positiboek bultzatuta, ikusturte honetan programa zabaldu eta sendotu egin da.

Tik-Tak-Tok izenak berak proiektuaren funtsa laburbiltzen dau: gazteen artean oso hedatuta dagoan TikTok plataformari egiten deutso erreferentzia, baina baita denporaren kudeaketari (“tik-tak” soinua) eta teknologia barriei (TIC/IKT) be. Hiru elementu horreen arteko loturak pantailen erabileraren inguruko kontzientziazioa indartu gura dau.

Programa Adikzinoen Prebentzinorako teknikariak eta kale hezitzaileak gidatuko dabe, eta Bermeoko Adikzinoen Prebentzinorako Tokiko Planaren barruan kokatzen da. Helburua da prebentzinoa eta hezkuntza uztartzea, eguneroko ohituretan eragin positiboa izan dezaketen tresnak eskainiz.

Informazino gehiago jasotzeko edo harremanetan jarteko:

 Bermeoko Adikzinoen Prebentzinorako Zerbitzua

• Gizarte eta Kultura Etxea (1. solairua)
• Martitzen, eguazten eta eguenak: 09:00-14:00
• Tel.: 675 02 50 18
• E-posta: bermeoprebentzioa@etorkintza.org

23 eta 29 urte bitarteko Euskadiko gazteek maiatzaren 12tik aurrera eskatu ahal izango dabez EMANTZIPA laguntzak

 

Emantzipatu? Orain errazago!

EMANTZIPA Eusko Jaurlaritzaren laguntza da, 23 eta 29 urte bitarteko gazteen emantzipazinoa bultzatzeko.

Onuradun bakotxak 300 euro jasoko dauz hilean, gehienez be 24 hilabetez, betibe ezarritako baldintzak beteten jarraitzen badau. Dirulaguntza hori jaso ahal izango dabe urtean 3.000 eurotik gorako eta 30.000 eurotik beherako diru-sarrerak daukiezan gazteek, edo 36.500 eurora arteko diru-sarrerak daukiezanek, baldin eta ezkontideagaz edo izatezko bikotekideagaz batera ordaintzen badabe.

Eskabideak aurkezteko epea maiatzaren 12tik azaroaren 30era arte izango da, biak barne.

Lanbide Heziketako 74.963 plaza eskainiko dira 2026-2027 ikasturtean, aurreko urtean baino 7.920 plaza gehiago

Eusko Jaurlaritzak 2026-2027 ikasturterako Lanbide Heziketaren barritasunak aurkeztu dauz. Eskaintza 74.963 plazakoa da, hau da, aurreko ikasturtean baino 7.920 plaza gehiago, Euskadi osoko 184 ikastetxetan banatuta, Eusko Jaurlaritzak herrialdeko eraldaketa ekonomiko eta sozialaren zutabe estrategiko moduan ezarritako apustuan.

• Maiatzaren 4an zabaldu da aurrematrikula Euskadiko 184 ikastetxeetan.
• Lehen aldiz, plazen %50 emakumeentzat gordeko dira zikloetarako sarbide-kuota guztietan, Lanbide Heziketan genero-bardintasuna bultzatzeko.
• Euskadiko Lanbide Heziketako ikasleen %90 ikasketak amaitu ostean zuzenean sartzen dira lan-merkatura.

Zelan eta noiz eskatu plaza?

Eskaerak aurkezteko epea gaurtik (maiatzak 4) eta maiatzaren 22ra arte egongo da zabalik. Eskaerak hiru modutan aurkeztu daitekez: online ikasgunea.euskadi.eus bidez, presentzialki Lanbide Heziketako ikastetxeetan bertan, edo ZUZENEAN zerbitzuaren bidez.

Hezkuntza Sailak gomendatzen dau lehentasun-ordenean gitxienez hamar aukera adierazotea, plaza lortzeko aukerak maximizatzeko.

PROZESUAREN EGUTEGIA:

• Maiatzaren 4tik 22ra: eskaeren aurkezpena.
• Uztailak 6: behin-behineko zerrendak argitaratzea.
• Uztailaren 9ra arte (12:00ak arte): erreklamatzeko epea.
• Uztailaren 13an: behin-betiko zerrendak argitaratzea.
• Matrikula arrunta: uztailaren 13tik 22ra (hiru fasetan).
• Matrikula berezia: uztailaren 23tik 24ra eta irailaren 1etik urriaren 16ra.

INFO+ hemen

Europak ateak zabaltzen deutsuz ikasketakaz jarraitzeko edo zure karrera profesionalari hasikera emoteko

Europak ateak zabaltzen deutsuz ikasketakaz jarraitu daizun edo zure karrera profesionalari hasikerea emon daizun, kultura eta esperientzia barriak ezagutzen dozuzan bitartean.

Europar Batasuneko kide garanez, Bizkaiko herritarrok abantaila eta onura ugari daukaguz Batasuneko herrialde guztietan; besteak beste, EBko edozein herrialdetan ikasteko aukera, unibertsitateko zein lanbide-heziketako titulu ofizialak baliozkotzea, eta atzerrian lan egiteko baimenik barik lan egin eta bizitzeko eskubidea.

EBko herrialderen batean zure bizitzako etapa barri bati ekiteko erronkari heldu gura badozu —ikasketakaz jarraituz, au pair modura lanean hasiz edo beste herrialde batean lana lortuz—, eta hori dana bertako hizkuntza ikasten, lagun barriak egiten eta tokiko kultura ezagutzen dozun bitartean egin gura badozu, Bizkaiko Foru Aldundiak argitaratutako Mugikortasun Gida Europar Batasunean 2026 kontsultau daikezu, zure desafio barri horretan lehenengo urratsak emoten laguntzeko.

Gidan, honako gai honeek aurkituko dozuz:

• EBri buruzko oinarrizko informazinoa.
• Herrialdeen arteko mugikortasuna eta Batasuneko herritar izateak emoten deutsuzan eskubideak, lan egiteko zein ikasteko arloan.
• EBko herrialdeetan lan egiteko eskubidea.
• Hezkuntza eta prestakuntzaren arloan EBk daroazan ekintzak.
• Programak eta ikasteko aukerak.
• Lanerako eta ikasketetarako mugikortasunaren egungo egoerea.

Horrez ganera, Batasuneko estatu bakotxean sartzeko eta bertan bizitzeko bete behar diran izapide zehatzak eta helmugako herrialdeei buruzko beste informazino interesgarri batzuk be aurkituko dozuz gidan.

Kapitulu baten, Erresuma Batuak Europar Batasunetik urten ostean daukan egoereari buruzko atal berezi bat be bada, bai eta Brexit‑aren ondoren han bizitzeko, lan egiteko eta/edo ikasteko baldintzen ganekoa be.

Bermeoko Udalak eta Visesa soziedade publikoak hitzarmena sinatuko dabe alokairuko babes ofizialeko 52 etxebizitza eraikitzeko

 

Bermeoko Udala eta Visesa soziedade publikoa hitzarmen batean lanean ari dira partzela bat doan lagatzea sinatzeko.

Partzela hori udalaren titulartasunekoa da eta Kaltzadape kalean dago, bidegorriaren hasikeran kiroldegirantz. Bertan, 𝗮𝗿𝗮𝘂𝗯𝗶𝗱𝗲 𝗼𝗿𝗼𝗸𝗼𝗿𝗿𝗲𝗸𝗼 𝗯𝗮𝗯𝗲𝘀 𝗼𝗳𝗶𝘇𝗶𝗮𝗹𝗲𝗸𝗼 𝟱𝟮 𝗯𝗮𝘁 𝗲𝘁𝘅𝗲𝗯𝗶𝘇𝗶𝘁𝘇𝗮 𝗲𝗿𝗮𝗶𝗸𝗶𝗸𝗼 𝗱𝗶𝗿𝗮. Horreetatik, 𝗴𝗶𝘁𝘅𝗶𝗲𝗻𝗲𝘇 %𝟱𝟬𝗮 𝟯𝟲 𝘂𝗿𝘁𝗲𝘁𝗶𝗸 𝗯𝗲𝗵𝗲𝗿𝗮𝗸𝗼𝗲𝗻𝘁𝘇𝗮𝘁 𝗶𝘇𝗮𝗻𝗴𝗼 𝗱𝗶𝗿𝗮.

ℹ️+ hemen

‘ZURESKU’ eta ‘GARILE’, Busturialdeko XII. Enpresa Ideia Lehiaketako irabazle nagusiak

Busturialdeko Gazteria Zerbitzuek antolatutako XII. Enpresa Ideia Lehiaketaren sari banaketa ekitaldia egin da abenduaren 4an Busturiako BBK Klima Abenturan. Danatara, 8 proiektu aurkeztu dira, eta 7.000 euro banatu dira eskualdeko gazte ekintzaileei laguntzeko, enpresa-proiektu barriak abian jartzeko edo martxan dagozanei bultzada emoteko.

Sariak eta proiektu irabazleak

• Lehen saria: ZURESKU (3.000 € + urtebeteko doako aholkularitza zerbitzua Torrealday Aholkularitza enpresaren eskutik)

Aiora Uriartek (18 urte, Arratzu) bultzatutako proiektuak egurrezko joko tradizionalak eta eskulanak berreskuratu eta gaurkotzea dauka helburu. Adin guztietarako jolas inklusiboak eskaintzen dauz, gizarte-inklusinoa, sormena eta belaunaldien arteko hartu-emonak sustatuz. Produktuak eskuz egiten dira Arratzun, material naturalakaz eta kalidadea lehenetsiz, eta salmenta presentziala zein online eskaintzen da. Bere katalogoak 200 jolas baino gehiago batzen dauz.

• Bigarren saria: GARILE (2.000 € + sei hilabeteko doako aholkularitza zerbitzua Torrealday Aholkularitza enpresaren eskutik)

Maddi Amezagak (29 urte, Errigoiti) sortutako ekimenak gari tradizionala eta nekazaritza-kultura berreskuratzea dauka xede, Busturialdean ingurumen-hezkuntza eta landa-ekintzailetza uztartuz. Proiektuak agroekologia, jasangarritasuna eta ondare kulturalaren babesa sustatzen dauz, Agenda 2030agaz lerrokatuta.

• Lehen sektoreko ideiarik onena: EBASZ (1.000 €)

Iker Egiak (25 urte, Ajangiz) sortutako proiektuak basogintzako zerbitzu integralak eskaintzen dauz: baso-landaketak, garbiketak, zur ateratzea, pista konponketak, mozketa eta garraioa. Helburua da eskualdeko beharrei erantzutea, zerbitzu arin eta fidagarriak prezio onean eskainiz.

• Aipamen berezia: BIZKAIGANE (1.000 €)

Errigoitin kokatutako ustiategi agroabeltzailea da, ekoizpen ekologikoan oinarritua. Belaunaldi-errelebo arrakastatsu baten ondoren, bost gazte ganaduz osatutako Txapelkoop kooperatibak hartu du lekukoa, abeltzaintza jasangarria eta tokiko garapena uztartuz.

Lehiaketaren helburua

Busturialdeko gazteen artean kultura ekintzailea sustatzea eta enplegua sortzea da lehiaketaren xede nagusia.

Sari banaketa eta epaimahaia

Ekitaldian parte hartu dabe Nadia Nemeh Bermeoko alkate andreak, Ager Lejarreta Urremendi Landa Garapen Alkarteko lehendakariak eta Ziortza Bilbao Gernika-Lumoko zinegotziak.

Epaimahaia honakoek osatu dabe: Joseba Irazabal (Gernika-Lumoko Udala, Lanbide Ekimenak), Jokin Garatea (Urremendi), Nerea Hormaetxe (Bermeoko Udala, Behargintza Enplegu Zentroa), Leire Zaballa (HAZI Bizkaia) eta Xiomara Gezuraga (IES Barrutialde).

Balorazino-erispideak izan dira: barrikuntza, balio erantsia, originaltasuna, kalidadea eta enplegua sortzeko potentziala.

Adikzinoen Prebentzinorako Udal Zerbitzua ezagutzen dozu? Erdu eta ezagutu eizu!

 

Substantziadun edo substantziarik gabeko adikzinoen inguruan, herritarrei zuzendutako informazino, orientazino eta aholkularitza zerbitzua.

ZER ESKAINTZEN DUGU?

• Tailerrak ikastetxeetan: sare sozialen eta bideo-jokoen erabilera egokia sustatzeko eta droga-kontsumoak eta ausazko eta kirol-jokoen kontsumoa prebenitzeko tailerrak.
• Familia eskolak: familiei bideratutako formakuntza-espazioak.
• Kanpainak herriko eragileekin koordinatuz.
• LOKALEKU programa: gazte lokaletan elkarbizitza egokia sustatzeko.
• Drogen kontsumoa edota hauek edukitzeagatik jasotako isunen ordezko neurri alternatiboen programa nerabeei zuzenduta.

NORI ZUZENDUTA DAGO?

Herriko edozein pertsonari: familiei, haur, nerabe, gazte eta helduei, eragileei…

NON ARITZEN GARA?

• Herriko ikastetxe eta formakuntza-zentroetan.
• Gazte lokaletan.
• Komunitatean.

👥 𝗕𝗘𝗥𝗠𝗘𝗢𝗞𝗢 𝗔𝗗𝗜𝗞𝗭𝗜𝗡𝗢𝗘𝗡 𝗣𝗥𝗘𝗕𝗘𝗡𝗧𝗭𝗜𝗡𝗢 𝗭𝗘𝗥𝗕𝗜𝗧𝗭𝗨𝗔

📲 675025018

📧 bermeoprebentzioa@etorkintza.org

📍 Gizarte eta Kultura Etxea, 1. solairua

📅 Martitzenetik eguenera | 09:00-14:00

Europara bidaiatuko badozu atara eizu Europako Osasun Txartela, Batasuneko edozein herrialdetan osasun zerbitzua izateko

Europako Osasun Txartela (EOT) agiri personal eta besterenezina da, eta eskubidea emoten dau ikuspuntu medikotik beharrezkoak diran osasun zerbitzuak jasotzeko, Europako Eremu Ekonomikoan, Erresuma Batuan edo Suitzan egindako aldi baterako egonaldietan. Aintzat hartuko da prestazinoen izaera eta aurreikusitako egonaldiaren iraupena, helmuga herrialdeko legeriaren arabera, eta egonaldiaren arrazoia turismoa, jarduera profesionala edo ikasketak izanda be.

EOT-ek ez dau balio joan-etorriaren helburua tratamendu medikoa jasotzea danean. Kasu horretan, Gizarte Segurantzako Institutu Nazionalak (INSS) edo Itsasoko Gizarte Institutuak (ISM) jagokon formularioa igorri behar dau, Osasun Zerbitzuaren aldeko txostena jaso ostean.

Kasu batzuetan osasun-laguntzaren zenbateko edo ehuneko finko bat ordaindu beharko da, helmuga Estatuko asegurudunek dabezan baldintza bardinekaz. Zenbateko hori ezin izango da itzuli.

Europako Osasun Txartela banakakoa da eta titularrari osasun zerbitzuak jasotzeko eskubidea bermatzen deutso. Eskatzen daben pertsonei emongo jake txartela eta turismoko bidaietan, ikasketa edota pentsioarengaitik egiten diran leku aldaketetan erabili ahal izango da. Txartelean titularraren izena, NAN zenbakia eta atzetik daukan Segurtasun Sozialeko Institutuaren zenbakia agertuko dira. Horreri esker tramiteak asko arinduko dira, izan be, orain arte derrigorrezkoa zan gaixoa bere herrialdeko Segurtasun Sozialeko bulegoagaz hartu-emonetan jartzea.

Europako Osasun Txartelari esker, Europar Batasuneko hiritar guztiek jaso ahal dabe Batasuneko edozein herrialdetan osasun zerbitzua. Doako zerbitzua izango da hori, eta ordaindu behar baldin bada, ondoren egingo da hori. Txartelaren balioa urte bikoa da (txartelean bertan adierazoten da iraungitze-data).

Egonaldiaren herrialdean zure EOT onartzen ez bada, SOLVIT sarera jo daikezu (solvit@ue.maec.es), Gizarte Segurantzaren Erkidegoko Araudia aplikatzen daben administrazinoen arteko arazoak konpontzeko doako zerbitzua, hain zuzen.

Zelan eskuratu?

• On line, Gizarte Segurantzaren Bulego Birtualean eskatzen badozu, etxean jasoko dozu txartela.
• Telefono bidez: 901 166 565 / 91 542 11 76 telefono zenbakietara deitu eta etxean jasoko dozu txartela, egun gitxiren epean.
• Gizarte Segurantzaren bulegoetan: Bilbon: Avda. Sabino Arana, 3 - 944 284 545 - Vicente Garamendi, 6 - 944 333 003 - Iruña, 13 - 944 478 366 - Gran Vía, 89 - 944 284 517 eta Gernikan: Juan Calzada, 89 - 946 257 107

EOT onartzen daben herrialdeak: Alemania, Austria, Belgika, Bulgaria, Zipre, Kroazia, Danimarka, Eslovakia, Eslovenia, Estonia, Finlandia, Frantzia, Grezia, Hungaria, Irlanda, Islandia, Italia, Letonia, Liechtenstein, Lituania, Luxenburgo, Malta, Norvegia, Herbehereak, Polonia, Portugal, Erresuma Batua, Txekiar Errepublika, Errumania, Suedia eta Suitza.