Eskualdeko gazteria zerbitzuek Busturialdeko Enpresa Ideien XIII. Lehiaketa antolatu dabe, Bizkaian erroldatuta dagozan 18 eta 35 urte bitarteko gazteei zuzenduta

Bermeoko eta Gernika-Lumoko udaletako gazteria zerbitzuek eta Ajangiz, Arratzu, Bermeo, Busturia, Elantxobe, Ereño, Errigoiti, Foru, Gautegiz Arteaga, Gernika-Lumo, Kortezubi, Mendata, Morga, Mundaka, Murueta, Muxika, Nabarniz eta Sukarrieta batzen dauzen Urremendi Landa Garapen Elkarteak Busturialdeko XIII. Enpresa Ideia Lehiaketa antolatu dabe Bizkaiko Foru Aldundiagaz batera, “Lana bilatzea, Lana da” eskualdeko gazteei laguntzeko programaren barruan.

Lehiaketaren helburuak, besteak beste, Busturialdean kultura ekintzailea sustatzea, komertzialki bideragarriak diran zerbitzu eta produktuak garatze aldera; enplegua eta aberastasuna sortzea Busturialdean eta eskualdeko ekonomiaren garapena bultzatzea eta sustatzea dira.

Lehiaketan 18 eta 35 urte bitarteko gazteek edo gazte-taldeek parte hartu ahal izango dabe, Bizkaiko Lurralde Historikoan erroldatuta badagoz eta negozio-ideia eta jarduteko gaitasun osoa badaukie, eta enpresa-ideia (enpresa edo ekoizpen-gunea) Busturialdean badago. Zerbitzu edo produktu baten ideia sortzaileak izan daitekez, edo 2025ean edo 2026an sortutako negozioak/enpresak, baina derrigorrez Busturialdean kokatuta egon beharko dabe.

Epaimahaiak jarraian adierazotako erispide, meritu eta elementuak baloratuko dauz aurkeztutako proiektuetan:

1. Ideiaren originaltasuna eta barrikuntza maila: balio erantsia eukitea edota originala izatea.

2. Talde edo norbanako ekintzaileak proiektua garatzeko dauzan gaitasunak.

3. Enplegua sortzeko aukera eta horreen kalidadea.

4. Negozioaren potentziala, garapen maila eta Busturialdean gauzatzeko bideragarritasun teknikoa eta ekonomiko-finantzarioa.

5. Eskura dagozan baliabideen aprobetxamendua, jasangarritasuna eta proiektuaren gizarte-erantzukizuna.

6. Gizarte-eragina.

Ekonomia Urdinagaz lotutako 1.000 euroko sari berezia banatuko da aurton

Lau sari honeek emongo dira:

• 1. saria: 3.000 € + Urtebeterako aholkularitza zerbitzua (Torrealday Aholkularitzak emondakoa).
• 2. saria: 2.000 € + Sei hilabeterako aholkularitza zerbitzua (Torrealday Aholkularitzak emondakoa).
• Lehen sektoreagaz lotutako ideia onena: 1.000 € (Aurreko sarietakoren bat jaso ez badau).
• Ekonomia Urdinagaz lotutako sari berezia: 1.000 € (Aurreko sarietakoren bat jaso ez badau).

Lehiaketan parte hartu gura dabenek azaroaren 6ko 14:00ak arteko epea dabe euren proposamenak aurkezteko. Sariak azaroaren 26an banatuko dira, Busturiko BBK Urdaibain.

Kontsultatu hemen lehiaketaren oinarriak eta izen-emote orriak.

Urriaren 7an zarratuko da aisialdiko begiralea izateko 2026/2027 ikastaroan izena emoteko epea

Bermeoko Gazteria Sailaren helburuetako bat gazteei aukera hezigarriak eskaintzea da eta, hori dala eta, aisialdirako begirale ikastaroa antolatu dau 2026-2027 ikasturterako, hezkuntza ez-formalean eta aisialdi hezitzailea maite daben gazteei zuzenduta. Aukera parebakoa da ume eta gazteakaz hezitzaile lanetan ibili gura dabenentzat, euskeraz eta balioetan oinarrituta.

Ikastaroak Ume eta Gazteen Aisialdirako Begirale titulua eskuratzea ahalbidetuko dau, Eusko Jaurlaritzeak homologatuta. Trebakuntza metodologia parte-hartzailearen bidez egingo da, tokian tokiko errealidadera egokituta eta honako balioetan oinarrituta: feminismoa, parte-hartzea, aniztasuna eta kulturartekotasuna. Helburua da aisialdi hezitzailea eta euskalduna sustatuko daben agente aktiboak trebatzea.

Ikastaroa 2026ko urriaren 17an hasiko da eta 2027ko apirilaren 24ra arte iraungo dau. Izena emoteko epea urriaren 7ra arte dago zabalik, GIZen, eskainitako plaza kopurua arinago beteten ez bada. Bermeoko Gazteentzako Informazino Zerbitzura hurbildu (Bermeoko Gizarte eta Kultura etxean) eta izen-emote orria bete beharko da.

Ikasturte osoko 9 asteburu Bermeoko Gizarte eta Kultura Etxean izango dira, zapatuetan, 10:00etatik 18:30era (ordubete eta laurdeneko atsedena bazkaltzeko). Hiru asteburu, barriz, La Arboledako aterpetxean izango dira (zapatuko 10:00etatik domekako 15:00etara).

Ikastaroa atal bitan banatuko da: alde teorikoa (150 ordu) eta praktikoa (160 ordu). Derrigorrezkoa da atal biak gainditzea. Ikastaroan parte-hartzeko, ikasleek 18 urte bete behar dabez 2027an zehar eta DBH titulua izan beharko dabe. Ikastaroa euskeraz izango da eta bertan parte-hartzeko euskeraz egiteko gaitasuna izatea ezinbestekoa da.

Helburu nagusiak:

• Jentartean eragiteko eta eraldatzeko kontzientzia kritikoa lantzea.
• Aisialdiko jarduerak planifikatu, dinamizatu eta ebaluetako autonomia eta gaitasunak lortzea.
• Talde-lana, teknika praktikoak eta ume zein gazte kulturen ezagutzea.
• Hausnarketa kritikoa eta sormena sustatzea.

Matrikularen prezioa 35 urte baino gitxiago daukien eta Bermeon erroldatutako gazteentzat 360 eurokoa izango da, beste guztientzat, barriz, 460 euro. Matrikularen barruan aterpeko hiru asteburuak (mantenu osoa) sartuta dagoz.

Ikastaroari buruzko informazino gehiago gura izatekotan, 94 617 91 58 telefono zenbakira deitu edo 688 81 99 50 WhatsApp zenbakira idatzi.

Gazteleku barria Jose Done ikastetxe ohian kokatuko da eta KIRIWIKI izena eukiko dau, Bermeoko Gazte Kontseiluak erabagita

Pasa dan ekainaren 5ean egin eban ikasturteko azken saioa Bermeoko Haur, Nerabe eta Gazteen Partaidetzarako Kontseiluak. Ikasturte osoan zehar, Gazteleku barria izango danaren proiektua izan dabe aztergai, eta egindako lanketaren ostean, Gazte Kontseilua osotzen daben 14 gaztetxoek (Eleizalde ikastolako, Sagrado Corazon ikastetxeko eta Bermeoko Institutuko DBH 1. eta 2. mailetako ikasleak) euren ondorioak eta hartutako erabagiak aurkeztu eutsiezan Bermeoko alkateari eta zinegotziei, Udaletxean egindako ikasturteko bigarren Osoko Bilkurean.

Ikasleek udalbatzari egindako proposamena, Gazteleku barria antxinako Jose Done Ikastetxean (Hermanuek) kokatzea izan da, hau da, Ametzaga gunean. Modu berean, gazteek eurek aukeratu dabe espazio barriaren izena be: KIRIWIKI izango da Bermeoko Gazteleku barriaren izena.

Gazteleku barriak 200 metro koadro inguruko azalera izango dau, eta, horrenbestez, orain arte erabilitako espazioa baino handiagoa izango da, izan be, Gizarte eta Kultura Etxean kokatutakoak 75 metro kuadro eukazan). Ikasturtean zehar, gazteek aukera izan dabe etorkizuneko Gaztelekuaren jardueren diseinua lantzeko, espazioaren hobekuntzak proposatzeko eta zerbitzua aberastuko daben ideia barriak mahai ganean jartzeko.

Bermeoko Udala hasi da dagoeneko Gaztelekua hartuko dauen gunea egokitzeko lanakaz, datorren ikasturterako prest egon daian. Lan horreek Ametzaga gunearen berreskuratze-prozesu zabalago baten parte dira. Izan be, eremu hori berroneratzeko lanean ari da udala, eta epe ertainera guneak bestelako itxura eta erabilera izango dauz, herritarrentzako espazio erakargarriago eta biziago bihurtuz.

Gazte Kontseilua Bermeoko Udaleko Gazteria Sailetik bultzatutako proiektua izan da, eta Bizkaiko Foru Aldundiak sustatutako ekimen baten baitan sortu zan, Bizkaiko udalerrietan haur eta nerabeen partaidetza-organoak bultzatzeko helburuagaz. Arduradunek azaldu dabenez, Bermeoko kontseilua izan zan 2025ean aurrera egitea lortu eban bakarra; hori dala eta, ikasleei egindako lanagaitik eta erakutsitako konpromisoagaitik harro egoteko modukoa dala adierazo deutsie.

Kontseiluko kideak oso gustura eta pozik aritu dira parte-hartze prozesuan eta datorren ikasturtean be kontseiluko kide izaten jarraitzeko asmo irmoa dabe. Izan be, galdetuta ia 2026/27 ikasturtean barriro parte hartuko daben, guztiek baieztatu dabe Bermeoko Gazte Kontseiluan jarraitzeko prest dagozala. Datorren ikasturtean, ganera, eurentzat interesgarriak izango diran beste hainbat gai jorratuko dabez.

Bermeoko Udalaren ustez, holako ekimenek gazteen ahotsa entzunarazoteko aukera emoteaz ganera, herritartasun aktiboa, erantzukizuna eta erabagiak hartzeko gaitasuna sustatzen dabez, etorkizuneko herria gazteekaz batera eraikitzeko oinarriak ezarriz.

Baperra eta tabakoa: tranpa bera, kalte bera. Ez bata, ez bestea... BAPEZ!

BAPEOAK eta TABAKOAK ez zaiezala LAINOTU 😶‍🌫️

BAPERRA eta TABAKOA: TRANPA bera, KALTE bera 🚬💨

✋ Ez bata, ez bestea… BAPEZ!

👉 Kontuan izan:

1. Ez hasi, ahal badozu.

2. Ez fiatu "seguruagoa da" esaten dabenekaz. Baperrak ez dira kalterik bakoak: nikotina, produktu kimikoak dabez eta biriketarako kalteak eragin daikiez.

3. Nikotinak menpekotasuna sortzen dau.

4. Laguntza eskatu. Badira laguntza programak.

5. Saihestu egoera arriskutsuak. Erretzen edo bapeatzen dan giroetan bazagoz, gatxagoa da ezezkoa mantenidutea.

6. Aukeratu beste plan batzuk.

7. Zure gorputza jagon. Ariketa, lo ona eta elikadura jaboteak estresa murrizten dau, eta 'ihesbide' modura bapeatzeko edo erretzeko tentazinoa txikitzen dau.

8. Sintomak entzun. Eztula, arnasa motza edo bularreko mina badozuz, ez normalizatu.

9. Presino sozialari aurre egin. "Danek egiten dabela" ez da egia.

10. Besteak errespetau eta babestu. Ez erretzea edo bapeatzea espazio partekatuetan besteak babesteko modua be bada.

🙏🏼 Gogoratu: BAPEOAK eta TABAKOAK ez zaiezala LAINOTU 🤯 😶‍🌫️

✋ Ez bata, ez bestea… BAPEZ! 💨❌

23 eta 29 urte bitarteko Euskadiko gazteek EMANTZIPA laguntzak eskatu ahal izango dabez azaroaren 30era arte

 

Emantzipatu? Orain errazago!

EMANTZIPA Eusko Jaurlaritzaren laguntza da, 23 eta 29 urte bitarteko gazteen emantzipazinoa bultzatzeko.

Onuradun bakotxak 300 euro jasoko dauz hilean, gehienez be 24 hilabetez, betibe ezarritako baldintzak beteten jarraitzen badau. Dirulaguntza hori jaso ahal izango dabe urtean 3.000 eurotik gorako eta 30.000 eurotik beherako diru-sarrerak daukiezan gazteek, edo 36.500 eurora arteko diru-sarrerak daukiezanek, baldin eta ezkontideagaz edo izatezko bikotekideagaz batera ordaintzen badabe.

Eskabideak aurkezteko epea 2026ko azaroaren 30era artekoa izango da.

Erabagi akademikoetan lagungarri izateko orientazinoa jaso dabe Busturialdeko familiek

 

Busturialdeko gurasoei zuzendutako lehenengo ikasketa eta lanbide orientazino jardunaldia burutu zan pasa dan apirilaren 18an Bermeoko Artza frontoian. Hurreratu ziranek Euskal Herriko zazpi prestakuntza zentrotako informazinoa jaso eta zalantzak argitzeko aukera izan eben.

Busturialdeko Gazteria Zerbitzuek (Bermeoko eta Gernika-Lumoko Udala eta Urremendi Landa Garapenerako Alkartea) eta Bizkaiko Foru Aldundiak bultzatutako ekimena DBHko 4. mailan eta Batxilergoan dagozan seme-alabak daukiezan familiei zuzendutakoa izan zan, etorkizun akademiko eta profesionala erabakitzeko momentuan euki ahal dabezan zalantzak argitzeko helburuagaz. Horretarako, Euskal Herriko zazpi prestakuntza zentrotako ordezkariekaz zuzenean berba egiteko aukera izan eben. 

Bizkaia Gazteak Busturialdea ekimenaren baitan kokatutako jardunaldia izan da, 2024ean hasitako bideari jarraipena emotea bilatu dauena. Izan be, orduan antolatu ziran gazteei zuzendutako lehen orientazino saioak, eta 2025eko azaroan, ostera, bigarrenak.

Bai antolatzaileek eta baita jardunaldian parte hartu eben zentroetako ordezkariak be balorazino positiboa egin dabe, familiekaz hartu-emon zuzena izatea eurentzat oso garrantzitsua baita, izan be, zentroetan ate irekien jardunaldiak egin arren, herrietako jardunaldietan hartu-emona zuzenagoa da eta euren zalantzak hobeto argitzen dira.

Bermeoko Adikzinoen Prebentzinorako Udal Zerbitzua ezagutzen dozu? Erdu eta ezagutu eizu!

 

Substantziadun edo substantziarik gabeko adikzinoen inguruan, herritarrei zuzendutako informazino, orientazino eta aholkularitza zerbitzua.

ZER ESKAINTZEN DUGU?

• Tailerrak ikastetxeetan: sare sozialen eta bideo-jokoen erabilera egokia sustatzeko eta droga-kontsumoak eta ausazko eta kirol-jokoen kontsumoa prebenitzeko tailerrak.
• Familia eskolak: familiei bideratutako formakuntza-espazioak.
• Kanpainak herriko eragileekin koordinatuz.
• LOKALEKU programa: gazte lokaletan elkarbizitza egokia sustatzeko.
• Drogen kontsumoa edota hauek edukitzeagatik jasotako isunen ordezko neurri alternatiboen programa nerabeei zuzenduta.

NORI ZUZENDUTA DAGO?

Herriko edozein pertsonari: familiei, haur, nerabe, gazte eta helduei, eragileei…

NON ARITZEN GARA?

• Herriko ikastetxe eta formakuntza-zentroetan.
• Gazte lokaletan.
• Komunitatean.

👥 𝗕𝗘𝗥𝗠𝗘𝗢𝗞𝗢 𝗔𝗗𝗜𝗞𝗭𝗜𝗡𝗢𝗘𝗡 𝗣𝗥𝗘𝗕𝗘𝗡𝗧𝗭𝗜𝗡𝗢 𝗭𝗘𝗥𝗕𝗜𝗧𝗭𝗨𝗔

📲 675025018

📧 bermeoprebentzioa@etorkintza.org

📍 Gizarte eta Kultura Etxea, 1. solairua

📅 Martitzenetik eguenera | 09:00-14:00

Mimarte, antzerkiaren bidez alkoholaren kontsumoaren prebentzinoan laguntzen dauen proiektua Bermeon izango da

Peter Roberts aktore komikoa Mimarte, arte para la prevención izeneko egitasmoaren saio bietako bat emotera etorriko da Bermeoko Nestor Basterretxea aretora, ekainaren 18an. Bermeoko Institutuko DBH2ko ikasleei zuzendutako saioa izango da ekainekoa eta, urriaren 2an, bigarren saioa eskainiko dau, Sagrado Corazon eta Eleizalde ikastolako DBH2ko ikasleei zuzenduta. Mimarte, antzerkiaren eta mimoaren bidez, nerabeen alkohol eta droga kontsumoaren prebentzinoan laguntzen dauen programa da.

Mimarte proiektuaren konpromisoa kontsumo-ohiturei buruzko hausnarketa sustatzean, arriskuei buruz ohartarazotean, DBHko ikasleei horreek identifikatzen laguntzean eta kontsumoaren ondorio sozial eta pertsonalei buruz informatzean datza.

Proiektua sortu zanetik, Euskal Herriko 66.000 ikaslek baino gehiagok hartu dabe parte ekimenean.

Bermeoko Ludotekak programazino berezia prestatu dau maiatzerako, ikasturte honetako azkena

Maiatzean be LUDOTEKA martxan egongo da, jarduera bereziekaz!

Maiatzaren 29an eta 30ean, ikasturteko amaiera jaialdia egongo da! Ez galdu!

👧🧒 6-11 urteko ume eta gaztetxoentzat

📅 Bariku eta zapatuetan

⏰ 17:00 – 20:00

📍 Bermeoko Gizarte eta Kultura Etxean

Europak ateak zabaltzen deutsuz ikasketakaz jarraitzeko edo zure karrera profesionalari hasikera emoteko

Europak ateak zabaltzen deutsuz ikasketakaz jarraitu daizun edo zure karrera profesionalari hasikerea emon daizun, kultura eta esperientzia barriak ezagutzen dozuzan bitartean.

Europar Batasuneko kide garanez, Bizkaiko herritarrok abantaila eta onura ugari daukaguz Batasuneko herrialde guztietan; besteak beste, EBko edozein herrialdetan ikasteko aukera, unibertsitateko zein lanbide-heziketako titulu ofizialak baliozkotzea, eta atzerrian lan egiteko baimenik barik lan egin eta bizitzeko eskubidea.

EBko herrialderen batean zure bizitzako etapa barri bati ekiteko erronkari heldu gura badozu —ikasketakaz jarraituz, au pair modura lanean hasiz edo beste herrialde batean lana lortuz—, eta hori dana bertako hizkuntza ikasten, lagun barriak egiten eta tokiko kultura ezagutzen dozun bitartean egin gura badozu, Bizkaiko Foru Aldundiak argitaratutako Mugikortasun Gida Europar Batasunean 2026 kontsultau daikezu, zure desafio barri horretan lehenengo urratsak emoten laguntzeko.

Gidan, honako gai honeek aurkituko dozuz:

• EBri buruzko oinarrizko informazinoa.
• Herrialdeen arteko mugikortasuna eta Batasuneko herritar izateak emoten deutsuzan eskubideak, lan egiteko zein ikasteko arloan.
• EBko herrialdeetan lan egiteko eskubidea.
• Hezkuntza eta prestakuntzaren arloan EBk daroazan ekintzak.
• Programak eta ikasteko aukerak.
• Lanerako eta ikasketetarako mugikortasunaren egungo egoerea.

Horrez ganera, Batasuneko estatu bakotxean sartzeko eta bertan bizitzeko bete behar diran izapide zehatzak eta helmugako herrialdeei buruzko beste informazino interesgarri batzuk be aurkituko dozuz gidan.

Kapitulu baten, Erresuma Batuak Europar Batasunetik urten ostean daukan egoereari buruzko atal berezi bat be bada, bai eta Brexit‑aren ondoren han bizitzeko, lan egiteko eta/edo ikasteko baldintzen ganekoa be.