2019/10/07

Eskualdeko gazteria zerbitzuek 'Busturialdeko VI. Enpresa Ideia Lehiaketa' deitu dabe 18-35 urte bitarteko gazteei zuzenduta


Bermeoko eta Gernika-Lumoko udaletako gazteria zerbitzuek eta Urremendi Landa Garapen Alkarteak, Bizkaiko Foru Aldundiagaz batera, 'Busturialdeko VI. Enpresa Ideia Lehiaketa' jarri dabe martxan, seigarren urtez jarraian. Lehiaketak enplegua sortu eta Busturialdeko gazteen ekintzailetza kultura sustatzea dauka helburu. Aurreko lau edizinoetan, danatara, 90 enpresa eta enpresa ideiatik gora aurkeztu ziran.

Eskualdeko gazteak lan mundura sartzea ahalbidetzen dauan "Lana bilatzea, Lana da" izeneko programa Bizkaiko Foru Aldundiaren ‘Gaztedi Busturialdea’ proiektuan kokatuta dago, gazteria politiken arloko 'Gaztedi Bizkaia 2020' programaren barruan.

Lehiaketak gazteen ideia barritzaileak abiatzeko eta enpresa ikuspegia saritzeko aukera eskainiko deutsie Busturialdeko eta gure eskualdetik kanpoko gazteei.

Busturialdeko VI. Enpresa Ideia lehiaketaren helburuak, besteak beste, eskualdean ekintzailetza kultura hedatu, Busturialdean lana eta aberastasuna sortu, eskualdeko ekonomia sustatu eta enpresa proiektu onenak saritzea dira.

Aurreko urteetako moduan, lehiaketa 18 eta 35 urte bitarteko gazte guztiei zuzenduta dago, beti be, aurkeztutako enpresa-ideiak (enpresa- edo produkzino-zentroa) Busturialdeko eskualdean kokatzen badira. Enpresa bat sortzeko ideiak edo 2019an sortu diran enpresak izan daitekez, baina Busturialdean egon behar dira, eta horreen sustatzaileek adierazotako adin-betekizuna bete behar dabe.

Epaimahaiak jarraian adierazitako irizpide, meritu eta elementuak baloratuko dauz aurkeztutako proiektuetan:
  • Izaera barritzailea: balio erantsia eukitea edota originala izatea.
  • Enplegua sortzeko aukera eta lanpostu horreen kalidadea.
  • Lantalde sustatzailearen gaitasuna (profil egokiak) proiektua arrakastaz garatu eta martxan jartzeko.
  • Proiektua Busturialdean gauzatzeko aukera edo eskualdera egokitzekoa.
  • Proiektuaren garapen- eta deskribapen-maila.
  • Proiektuaren jasangarritasuna (ingurumenari zein ekonomiari jagokenez).
  • Gizarte-eragina.
Lehiaketan parte hartu gura dabenek azaroaren 15eko 14:00ak arteko epea izango dabe euren proposamenak aurkezteko. Sari-banaketa abenduaren 19an, eguenan, izango da.

Irabazleak 3.000 euroko saria jasoko dau, bigarrenak 2.000 eurokoa eta lehen sektoreari lotutako ideiarik onenak, barriz, 1.000 euro jasoko dauz, aurreko sarietako baten bat jaso ez badau. Ganera, lehen eta bigarren sarituei Arratzuko Elkartegiko langune bat doan itziko jake urte batez. Halanda be, epaimahaiaren eritxiz ideiek ez badaukie gitxieneko maila, sariak emon barik geratu ahalko dira.

Hiru sari horreetatik aparte, aurton, nobedade moduan, Silver Economy edo Zilarrezko Ekonomiari (adineko pertsonei bideratutako ekonomia, adineko pertsonen beharrak asetzen dabezan jarduera ekonomikoak) lotutako ideiarik onena be sarituko da. Horrek 1.000 euroko saria eroango dau, beti be aurreko sarietako baten bat jaso ez badau.

Interesdunek, Bermeoko Gazteentzako Informazino Zerbitzura (GIZ) jo beharko dabe informazino gehiago lortzeko eta izen-emote orriak batzeko. Bestela, www.gaztedibusturialdea.eus web-orrian be izen-emote orriak eta informazino osoa lortu daiteke. Izen-emote orri horreek eta eskatutako ganerako dokumentazino guztia paperean aurkeztu beharko dira Bermeoko Berh@z bulegoan, azaroaren 15eko 14:00ak baino lehenago.



2018ko irabazleak
Pasa dan urtean ‘Glamping Busturialdea’ izeneko ideiak eroan eban 3.000 euroko lehenengo saria. Busturialdean turismo natural eta jasangarria sustatzeko ostatu alternatiboa proposatu eban Irati Arrien Jauregi gazte gernikarrak aurkeztutako ideia horrek.

Bigarren saria, 2.000 eurokoa, ‘Hondabizi’ izeneko proiektuak jaso eban. Produktu lehiakorrak sortzeko hondakin organikoen kudeaketa, tratamenduak eta balio erantsiko soluzinoak eskaini ebazan ideiak. Ander Etxaniz de Miguel eta Borja Txertudi Gangoiti gazte busturitarrak izan ziran ideiaren sortzaileak.

No hay comentarios:

Publicar un comentario

Bermeoko Gazteentzako Informazino Zerbitzua ez da hemen adierazotako eritxien eta jasotako ideen erantzule egiten, baina parte hartzeko, erabiltzaileak gitxieneko baldintza honeek kontuan euki beharko dauz:

1.- Era honetako mezuak ez dira onartuko: neurribakoak, lizunak, enpagugarriak, mehatxatzaileak, faltsuak, difamazinokoak, sexu orientazinokoak, pertsona partikularren identidadea erakusten dabenak, datu pertsonalak daroezanak, diskriminatzaileak, iraingarriak, egile eskubideak urratzen dabezanak edo legearen aurkakoak izan daitekezanak.

2.- Aurreko puntuan adierazotako moduko mezuren bat jarri ezkero, mezua ezabatu egingo da.